Axenda Mazucu

Conferencia "Asturies en tiempos convulsos"

CONFERENCIA
ASTURIES EN TIEMPOS CONVULSOS. XOVELLANOS FRENTE A UNA SOCIEDÁ EN CRISIS

El martes 14 d'abril, a les 19H.00', nel llocal social del Atenéu Obreru de Xixón (Cai Francisco Tomás y Valiente, 1 - 2ª Planta), Ástura organiza la conferencia Asturies en tiempos convulsos. Xovellanos frente a una sociedá en crisis, a cargu de Joaquín Ocampo Suárez-Valdés.

Esta actividá mensual en torno a la promoción de la cultura asturiana ye una collaboración ente les entidaes Atenéu Obreru de Xixón y ÁSTURA.

A diferencia del so compatriota y paisanu Campomanes, a Xovellanos tocó-y vivir ún de los periodos más difíciles de la historia d'España y d'Asturies: el de la transición del Antiguu Réxime al Estáu lliberal, ye dicir, el pasu de la Edá Moderna a la Contemporánea. Foi una etapa marcada por acontecimientos de gran importancia, tanto nel esterior (independencia de los Estaos Xuníos, Revolución francesa o l'entamu de la emancipación colonial) como nel interior (invasión francesa, Guerra de la Independencia o Cortes de Cádiz), que condicionaron fondamente la vida política y social, y tamién la de los últimos ilustraos, ente ellos Xovellanos. El fechu de que fuera encarceláu ente 1801 y 1808, dempués de ser ministru ente 1797 y 1798, da una idea bien clara de la inestabilidá y la convulsión d'aquellos años. Nesi contestu, Asturies -una de les provincies más probes d'España- foi testigu de los esfuerzos de dos de los sos ilustraos más representativos, Campomanes y el propiu Xovellanos, por abrir un camín de desarrollu que-y permitiera avanzar escontra la modernidá económica. Les esperances punxéronse, sobre too, nes comunicaciones -romper l'aisllamientu cola Meseta y ameyorar l'accesu portuariu per Xixón- y nel carbón. Pero, nos dos casos, les dificultaes de la facienda pública y la guerra acabaron por frustrar esi procesu, torgando qu'Asturies entrara nel sieglu XIX coles bases d'una economía industrial.

Joaquín Ocampo Suárez-Valdés, magar qu'él prefier ser tratáu como un obreru de los estudios históricos, ye un referente nel ámbitu de la historia económica y empresarial, con una trayeutoria académica y docente de más de cuatro décades. Llicenciáu n'Historia pola Universidá d'Uviéu y doctor n'Historia Económica pola Universidá Complutense de Madrid, completó la so formación n'instituciones de gran prestixu como'l Conseyu Superior d'Investigaciones Científiques, el Bancu España y la Confederación de les Caxes d'Aforru. Desendolcó una intensa llabor docente per 47 años, como profesor titular y darréu caderalgu d'Historia ya Instituciones Económiques na Universidá d'Uviéu, d'onde agora ye caderalgu eméritu. La so actividá académica llevólu, amás, a impartir docencia n'universidaes internacionales de Francia (Aix-en Provence y Marsella), Alemaña (Mannheim), Cuba (Cienfuegos) y Méxicu (Guadalajara). Como investigador, cuenta con una obra bien amplia y reconocida: más d'una trentena d'artículos académicos, mediu centenar de capítulos de llibros y 26 llibros propios. Ente les sos llinies de trabayu destaquen la historia económica de l'Asturies moderna, el pensamientu ilustráu -con especial atención a figures como Xovellanos o Campomanes- y la evolución d'empreses asturianes d'orixe rural qu'algamaron proyeición internacional (ALSA, Reny-Picot, Gondán, El Gaitero, etc.). Participó en numberosos proyeutos d'investigación y en comisiones científiques de relevancia, como les venceyaes a los bicentenarios de Campomanes, Sargadelos y Xovellanos, siendo amás comisariu de la esposición del Bicentenariu de Xovellanos en Xixón. La so trayeutoria foi reconocida con importantes premios, ente ellos el Premiu Juan Uría d'Investigación, el Premiu Internacional d'Ensayu de la Fundación Foro Jovellanos y, más recién, el Premiu Nacional d'Historia Empresarial. Anguaño sigue investigando, centráu en temes como les escueles d'aprendices n'España dende 1850 o la industria del curtíu n'Asturies.